بسم اللہ الرحمن الرحیم
۱۔ شجرۂ نسب رحمت اللعالمین محمد رسول اللہ ﷺ تا آدم علیہ السلام
۲۔ شجرۂ نسب خاندان اُتمان زئی تحصیل ایبٹ آباد تا آدم علیہ السلام
تسمیہ: اتمان زئی یوسف زئی اصلی ((مندڑ قبائل))
اولادِ مندڑ یعنی اتمان زئی وغیرہ (مندڑ قبائل) اور اولادِ ملک یوسف عرف عام میں یوسف زئی اصلی کہلاتے ہیں۔ باقی تمام قبائل جو ہمیشہ ریاست یوسف زئی میں یوسف زئیوں کے ساتھ فتوحات اور جنگ میں ساتھی اور معاون رہے وہ یوسف زئی وصلی کہلاتے ہیں۔
السلام علیکم!
اس ویب سائٹ کو 2009 میں شروع کیا گیا اور تا حال اس پر کام جاری ہے۔ آدم علیہ السلام تک شجرے کے سلسلے کو جوڑا گیا ہے۔ بابائے پٹھان قیس عبدالرشید سے حضرت یعقوب علیہ السلام تک بنی اسرائیل کے نام بعض وجوہ کی بنا پر فی الحال حذف کیے گئے ہیں۔ حضرت ابراہیم علیہ السلام سے شجروں کی دو شاخیں شروع ہوتی ہیں: حضرت اسحاق علیہ السلام والی اور حضرت اسماعیل علیہ السلام والی۔
حضرت اسحاق کی اولاد سے بنی اسرائیل اور پٹھان آتے ہیں۔ حضرت اسماعیل کی اولاد سے 62 ویں پشت پر حضرت محمد رسول اللہ ﷺ کا نام آتا ہے۔ یوں اللہ کے آخری نبی رحمت اللعالمین ﷺ کا بھی تمام شجرہ اس شجرے میں شامل ہے۔ حضرت فاطمہ رضی اللہ تعالی عنہا اور کسی حد تک حضرت علی رضی اللہ تعالی عنہ کی اولاد کا شجرہ بھی شامل ہے۔ خاص خاص عرب قبائل کا شجرہ بھی اس میں شامل ہے۔ اور یہ سالوں کی تحقیق اور محنت کا نتیجہ ہے۔
اس کامیابی میں ممد و معاون ہونے پر بہت سے لوگ شکریہ کے مستحق ہیں، لیکن خاص طور پر ایڈووکیٹ فاخر علی ترک کا تعاون، محنت اور لگن شامل ہے۔ فاخر علی ترک نے یہ ویب سائٹ ڈیویلپ کر کے دی اور پھر اس میں مسلسل تبدیلیوں کے لیے بھی کام کرتے رہے۔
پھر میں نے مطالعہ اور تحقیق کر کے ایک ایک لفظ کی انٹری کی۔ خاندانِ اتمان زئی تحصیل ایبٹ آباد کے شجرے کو Main Stream شجرہ ہائے اتمانزئی کے ساتھ جوڑا گیا۔ اتمان زئی کی بھی کئی شاخیں ابتدائی طور پر اس میں درج کی گئیں، خاص طور پر کھلا بٹ والے بوبا خیل علی زئی اتمان زئی اور غازی والے طاہر خیلی (تارخیلی) اتمان زئیوں کو بھی اس میں ابتداً شامل کیا گیا۔
خاندانِ اُتمانزئی تحصیل ایبٹ آباد خود بھی طاہرخیلی ہے جو طاہر خان (تارخان) کے بڑے بیٹے شاہ مست خان (شامت خان) کی اولاد ہے، جس کی ایک شاخ تحصیل ایبٹ آباد میں آباد ہے جبکہ دوسری شاخ بونیر میں آباد ہے۔ جبکہ کھلا بٹ والا خاندانِ اتمانزئی -- سیدخانی ۔۔ بوبا خیل -- علی زئی -- اتمانزئی ہے۔
اس ویب سائٹ پر دوسرے خاندانوں کے شجرے شامل کرنے کی گنجائش بھی موجود ہے جس طرح کہ کنج قدیم ایبٹ آباد والی ترک فیملی کا شجرہ اس میں موجود ہے۔
اس ویب سائٹ کو کئی وجوہ کی بنا پر ازخود اندراج کے لیے کھولا نہیں جا سکتا۔ تکنیکی طور پر بھی ابھی مشکل ہے اور منطقی طور پر بھی یہ ممکن نہیں ہے۔ Domain and server کے بھی مسائل ہیں۔ اللہ کرے کہ یہ سلسلہ چلتا رہے۔
ابھی اس ویب سائٹ پر فرنٹ پیج اور باقی کام کی ضرورت ہے جو ان شاءاللہ وقت کے ساتھ ساتھ چلتا رہے گا۔
اس ویب سائٹ کا استعمال آسان ہے:
utmanz.just.pk پر لاگ اِن ہونے کے بعد Name اور Father Name کو پُر کیجئے یا پھر ناموں کے شروع کے کچھ سپیلنگ ڈالئے، پیج میں آپ کا نام اردو میں کھل جائے گا بشرطیکہ آپ کے سپیلنگ سسٹم میں ڈالے گئے سپیلنگ سے میچ کر رہے ہوں۔ کوشش کی گئی ہے کہ تمام ممکنہ سپیلنگ سسٹم میں موجود ہوں۔ اس کے بعد آپ نے صرف ان ناموں کو کلک کرتے جانا ہے۔
آپ اوپر یا نیچے، دائیں یا بائیں کلک کر کے جا سکتے ہیں جہاں تک نام موجود ہیں۔ اگر آپ کا پیج نہیں کھل رہا تو آپ سپیلنگ کو بدل کر یا شارٹ کر کے بھی ڈال سکتے ہیں۔ بغیر والد کے نام کے بھی آپ کا نام کھل جائے گا یا وہ تمام نام کھل جائیں گے جو اس سپیلنگ کے ساتھ شجرے میں موجود ہیں۔
اس میں آپ اپنے نام اور ولدیت کو چیک کر کے اپنے نام کو کلک کر سکتے ہیں۔ میسر معلومات کی حد تک جن اشخاص کی شادی خاندان ہی میں ہوئی ہے، اُن کا نام اس کی بیوی کے شجرے کے ساتھ بھی منسلک کر دیا گیا ہے۔ نام کو ڈبل کلک کر کے بیوی کے شجرے پر جایا جا سکتا ہے یا بیوی کے نام کو کلک کر کے خاوند کے شجرے پر۔
(پروفیسر سمیع اللہ سمیع، اسلام آباد)